Nel añu 2000 estuve tres meses trabajando en un kibutz en Israel. Jaz una década, too el mundo parlaba de lu cerca que bían llegáu palestinos e israelíes en Camp David. La paz apaecía tan cerca que enos papeles la engarra era porque los palestinos de Jerusalen este (que sedría parte del nuevu estáu) querían caltener la su tarjeta amarilla pa aceder a los servicios israelíes. Lo cotidianu ocultando lo esistencial.
El kibutz Lehavot Habasham s´alcontraba nel norte del país, nel deu que surde al norte del lagu Tiberíades. Lu bían fundáu enos años 30 sionista que trajerin nuevas formas de agricultura, desecarin el lamizal del valle del Hula y (cuntaban orgullosos los mayores) bían termináu con la malaria que infestaba la zona. Convivían conos árabes hasta la guerra del 48 y se convirtierin en linde del nuevu estáu judiu. Bunkers y muertos hasta que el 67 les trijo too el Golán pa sentise siguros. Del socialismu atal enos años 30 al posibilismu que ajoñaba col sindiu del siglu XXI. Un sistema comunitariu que s´esborregaba pol pesu del individualismu y el desencantu del sionismu.
Pero tamién un lugar mágicu con chacales y magostas que arrodiaban el asentamientu pola nochi, tarducas preciosas con el sol cayendo pol cercanu Líbano y unos vecinos que parlaban cumu salíos del Quijote (los más mayores d´ellos eran judíos de Estambul y el sefardí era la su lengua).
Jerusalen, Tel Aviv, Acre, Haifa... pero tamién Belén y Hebrón. Hebrón cumu contrapuntu de la palestina judía. Un lugar ondi cien colonos aprastajaban a 150000 presonas y el odiu jirvía por toas partes.
La paz juesi y van pa una década odiándose. No sé cúmu sedrán pa solucionalu y ya casi ni me importa: me cansa. Un lugar tan guapu echáu a perder.
No hay comentarios:
Publicar un comentario