24 febrero 2012

Culturas pulíticas

Cumo Cameron, esti periódicu tien un gran aquel a la Unión de Engalaterra con Escocia. [...] Cona upinión escocesa tresponiendo poc´a pocu pol caminu nacionalista, Cameron puei acertá al calculá que cuanto antes sea la votación, más probable es que risulte pa caltené la Unión [...] Se diz que Salmond, el ministru prencipal de Escocia, quier ganá tiempu pa gastá el dineru englés, ensin obedecé las normas británicas. [...] Si los más d´ellos quierin estu, los votantes del sur de la frontera deben tener el drechu a invalidalu. Pero si la custión es sí o no a la endependencia, mosotros tendremos de respetá los deseos escoceses.

The Daily Mail


De los franceses, la cucina; de los italianos, la moda; de los alemanes el trabaju; y de los británicos, la su cultura pulítica.

17 febrero 2012

Dudas

"Es más placenteru aluchá por unos principios que viví d´alcuerdu a ellos" Alfred Adler.
Porque al final del día, cuando trancas la puerta de casa ¿qué queda?

09 febrero 2012

Libertaes chicas

El digital de El Mundo tien a veces unos reportajes bien guapos sobre presonajes de la intrahestoria uropea que dan un aquel optimista arrodiáu de noticias negativas. Las más de las veces ruchan alreor de la guerra mundial o los totalitarismos del siglu XX porque cuando apaez maldá en abondu es cuando tamién surde lo mejor de las presonas. Los embajaores españoles que asubiarin judíos pa que no se los llevaran a campos de concentración, el soldáu polacu que entró voluntariu (sí, voluntariu) nun campu de concentración pa espiar qué se jacía allá o el de aquel alemán que no levanta el brazu col saludu nazi y que jue condenáu por casase con una judía.

Anédotas con una leción. Inclusive enos momentos más difíciles el individuu puei decidir las sus aiciones y no dejase llevá; encarapuchándose colas juerzas que a güen siguru acabarán con él; dando un ejemplu de libertá.

05 febrero 2012

Paisanu de biblioteca

El mi hermanu, que vive en Madrid, va tené un críu y el otru día le bajó a la mi madre el Skype pa podé velu medrá. Podrán hablar y ver la caruca del nenu. Too pola rede.

El otru día la conesión diba un pocu despaciosa y la mi madre rutaba y picaba col ratón ena mesa. Una mojer que cuando nació ente brañas solo tinían una bombilla en casa, rispiaban ena burdiera, se lavaban nuna palangana y el chocolate y el pan blancu eran cumías de dumingu. Abora s´acelera porque el interné va lentu. Es una generación que vivió un cambeo que quiciás no güelva a producise ena historia: de la basna al coche.

Pero la genti que vivió cumo los antiguos no tien la oportunidá d´amirá aquellu conos ojos de los que ya nacimos abaju. Mosotros podemos estanos en sotilezas, idealizalu, sublimalu o literatulizalu: pero ellos no. Lo que pa nos es un forma de parlar bien guapa ellos lu vivierin cumo inorancia; la vida comunitaria cumo opresión d´un sistema de valores bien cerráu; el conceju cumo mazcarita del poder; los bellos montes y las brañas cumo entornu difícil pa trajinar.

Siempri vi esti mundu dendi la barrera, tras de los libros, de las idealizaciones. Sin el hombral alifazáu y los espaldares lijáos.

Soy un paisanu de biblioteca.