Nel últimu cuestu enantes d´allegase al pueblu está la cruz. De chico me dicían los mis padres que la pusierin porque allí apaecierin muertos dos paisanos años atrás. Era un misteriu pa mi. Porque la otra cruz del valli, la de la carretera prencipal, sempri tuvo la su hestoria bien documentá. De tantu en tantu, al pasá andando por alantre d´ella fulanu o zutanu sospiraba por el probe médicu que cayó por aquella valleja yendo a atendé un partu. Diba en motu; un aire l´esmengó; no jue pa controlalá. Y te dicían la hora del día, cúmo caían las chispas, la cilindrá la motu y el nombre del que tuvo que nacer solo.
Pero de la otra cruz, ná. Solo los mis padres, solo unas pocas palabras.
Siendo ya mozu unu tinía un aquel polas hestorias la su abuela y s´alampaba por escuchala parlar d´otros tiempos, de cuando los casares eran casas y en las escuelas tovía enseñaban maestros. Y poc´a pocu jue surdiendo.
En aquel valli tras de la guerra el silenciu no era solo la pulítica. Allá el silenciu lo imponía tamién el estraperlu, la jarina pal pan blancu. Y sí, apaecierin dos muertos: Másimo y Jisús. Nel 41. Hestoria pentástica de probis, ispuestos, mintiras y engatás. Muertos pola autoridá; la autoridá del dineru.
Nunca dejes fiau ena tienda, dicía la mi bisabuela. Ella bien tuvo de sofrir pa cumplí la su alvertencia siendo mojer de atullicíu. Pero ajuyía de la autoridá, la autoridá del dineru.
No hay comentarios:
Publicar un comentario