Jacelu

Hay daque días que unu espierta clisáu. Paez que tien que alcordase de porqué vien jaciendo lo que jaz dendi tiempu, porqué trajina cuiciosu con ciertas cosas que a naidi emportan, porqué derrocha energía y cuartos en angu que s´esmanó pa no golver… Son días de murria y galbana. ¿Pa qué siguir? Apaez ena sesera el científicu de Parque Jurásicu que obsesionau con resurdir lo esapaecíu y atontau pola belleza del resultau no se pispa de que creo un monstruo y que hay cosas que mejor siguir amándolas muertas. Que cuando la bella moza s´ispurre dimpués del besu del príncipe, escomenza una vida nada bucólica. Y discurro atropar las alcordanzas comu trapos viejos, jacer un coloñu y echalu pa lumbre con los tarmaos y las estiyas; olvidar to y mirar palante…
Pero no puedo. Hay una fuerza irresistible que jirmame hacia anguna parte y que no hay quin la pare. Tengo de jacer angu y estu es lo único que daprendí en tantos años. No tengo otra inteligencia ni otra opción.
Sé que no hay futuru, sé que va en balde… pero tengo de jacelu.